Yo ngka studanti. Istih yo ja falah
mutu tantu bes, kung jenti-jenti kereh ki
yo lembrah olotu justu kereh bringkah chiki
kung yo. Bestadadi, ah, Kevin Martens—
klai bos podih lembrah tudu ladrang
logu mostrah olotu sa mang? Klai falah
“midu” na otru Inggres di Singapura?
Klai falah “mistih buskah stiru” kontu bos pidih pra presu
na greza, na stradu, na isti otru sa butika?
Infernu ja abrih?
Isti yo ngka sabeh. Mas kora yo fikah mas krensa
olotu desah ki yo lambeh-lambeh
gradi di tudu porta.
Olotu desah ki yo kumih-kumih
yo onsong sa medra
chuma kachoru. Chuma ngua semprenza
ja matah, mambes, kung mambes, kung mambes.
Isti sertu. Akeli deus-deus tres-tres
nteh naki. Mistih buskah ngua astrang kuartu:
eli ngka yo. Yo sa boka ja tokah incheh di
olotu sa fatu.
Yo sa bariga ja tokah prendeh
klai bibeh seng kauzu.
Yo sa mulera, alma, korsang kung korpu
tudu ja achah ganyah ngua presu:
di alsu.