Kortah dos?
Nadi. Yo gostah klai bos sa sos
di korpu ta drumih
na yo sa peli, ta sai forsa
di bos sa pau soneh,
ta botah na riba undi yo sa lembransa
ta kureh:
ki sorti di blangkas
lembrah podih fazeh
ngua sonu di kambradu-kambradu
ta abrasah chuma mar sa
kolek-kolek
mas presta di mundu;
mas kalor.
Prepresta yo ja prendeh akeli cheru uniku
di bos sa sor.
Prepresta yo ja prendeh bos onsong sa korsang
sa balor.
Prepresta bos ja gostah mutu tantu
yo sa ketiak sa sabor.
Mutu tantu sumana dispois,
kora yo ta dalih tambor
pra yo sa morti #128,256
onsong —
yo logu kuniseh ki sol
ngka dibeh, ki
yo sa bida miyor di
ngua kabesa ja tokah fendeh
kortah dos.
Yo nadi podih skiseh akeli chuwa di
bos sa sor.
Yo nadi podih nggereh akeli sintidu di
bos sa balor.
Yo nadi podih lambeh
yo onsong sa sabor.
Pidih pedrang?
Bos?
Klai fazeh ngua ladrang?
Birah albi ja tokah furtah?
Bos nang.
Nadi chomah kung yo Sinyor.
Justu buskah ngua manera
pra sugah bos sa sor
inda ta gapeh kung yo sa korpu:
mas presta. Yo ta dalih tambor.
Mas presta. Kauzu nggeng desah
bos sa fabor.