Eli sa xamandra ja trukah;
bos nenang ubih? Eli ja fikah
Xamang, di Jungian Psychology kung Shakespeare,
kung Innovation in Education.
Kung Technology and Empire.
Na Mes Pedros, eli mesu logu dah
eli sa papiasang na Kristang. Pra
bes prumiru na tudu mundu,
ngua jenti logu kontah nus sa stori mutu renggu
na nus onsong sa linggu,
na stradu di mundu mas trabalu:
academia,
undi-undi jenti exallos
inda ta sperah pra tudu
beng rintah olotu sa gayola,
pedreh tudu olotu sa sintidu
di ki sorti di peskisa podih fikah
Sabia.
Podih teng merseh kriseh fikah
ardansa, kung chadisa.
Podih dah impoku lumi kung kadangua sombra.
Podih dah abizu kung alma
di alkandra.
Korsang sa tera
ja incheh kung meza-meza Kristang ja beng di tudu semesta-semesta.
Ja kuzeh ngua rikeza bemfetu di tudu sorti di tempra,
kora olotu ja fuzeh,
bai pra kadangua infernu sa lembransa.
Mas bos? Undi bos kereh
konstrah kaza?
Agora ngka sabeh;
nang asih, bai pradianti
yo pun lembrah mbes pra mbes
logu ganyah ngua via sempri mas
hierosa.
Tudu kaminyu, sertu,
pra fing fikah sa isti
Kabesa.
No posts