Ki bos kereh — impoku di amizadi?
Ke fikah amigu-amigu di chang, maski
bos ja tomah muleh pra fikah bos sa berdadi.
Asih? Asih yo impodih fudeh kung bos, numpodih!
Pra ki kauzu?
Kauzu klai logu pasah, kora teng ngua dia na amiang sa dianti
kora yo kereh kazah kung bos?
Kora yo kereh fikah chuma Ishraq, Zephaniah kung Oz?
Kora bos teng impoku mas di ngua alma latlos
nenang sabeh sintidu di forsa
ta rintah na buraku sa nosta?
Ki ngka sabeh klai tamanyu ngua pau
mistih fikah, antis bos gritah, na jenti brangku sa Inggres:
Aiyoh! This is yours.
Seng. Isti yo sa.
Grosu, sempri ta trimih, kung pezu di ngua lembransa
di klai jenti ja dah kung nus, seng fing, kadangua trumenteza
di bida. Kadangua futura inchidu di firida
kauzu nus teng midu di ngua gay Singaporean Kristang leader.
Mas bos teng midu?
Nadi teng. Yo sa korpu mas sabrozu di feng,
mas sabrozu di tudu sorti di tempra podih beng
di ila-ila kemadu, di mar-mar asadu,
di rikeza-rikeza tomadu.
Bebeh di yo sa fonti.
Bos logu prubah safrang, kadamundu kung kari
sagradu ja kuzeh di isti debal:
yo, astrang di semesta inchidu di oru sa leti,
nadi podih fikah keng-keng ke kalkizera mal.
No posts