Tamanyu, eli.
Asih, pra kauzu di istoria, yo mistih dah kung eli angkoza famadu, ngua nomi uniku:
Maliduensa sa Pau.
Chadu, ah, nomi isti?
Yo ja sibrih
yo sa mulera Kristang
ki tudu otru jenti ja skribeh na olotu sa stori-stori.
Mas klai Maliduensa dali gatu?
Klai Maliduensa ja nsolpah prepresta tudu jenti di isti mundu?
Klai eli ja podih trukah tempu,
podih skribeh ardansa duenti kung nubu?
Podih komesah dos Gera di Mundu kadados mal—
ati membes yo konfiah isti semesta dretu teng fitiseru?
Ati lembransa ja kabah kemah seu.
Ati donu di mundansa ja kabah abrih porta feu.
Ati korsang kung kara ngka mistih olah bolotu sa perna kung peu.
Ngka desah skutah kung bos sa korpu dispidu, bos sa ku
fendeh kema boka kereh kumih nus interu.
Ngka desah buskah ngua otru sorti di diabu.
Nus tudu, diski stori-stori rainya, teng naki;
numistih kriseh rais kung fola otru.
Numistih teng kadangua sorti di Albi di Morti
pra angkrah ngua berdadi sa kontrontru.
Numistih pedreh tudu sorti di alkandra:
presta-presta, tudu komunidadi logu pedreh
tudu di olotu sa jarding kung floris
kung animega, bong kung mal,
antigu.