Justu nali
bos podih lo ingkontrah kung jenti brani;
teng mutu trabalu pra olotu andah-andah
na isti mundu sa praya;
gapeh kung nus sa bandera.
Pra ki kauzu?
Pra praya sa kauzu;
mar sa odring bai rintah
tomah tudu ngka suzu.
Justu ngua paredi, nali podih detah,
ja largah pra Telok Saga sa filu-fila.
Paredi sa nomi
justisia.
Paredi sa nomi
pasiensia.
Paredi sa nomi
stori, undi podih fikah
ngua ila menus brani,
ngua kaza impoku mas grandi,
ngua sintidu di alkandra
seng saodi,
seng lagri,
kauzu teng lei falah numpodih churah.
Agora, bai na tras di akeli banda
bos sempri logu ingkontrah justu ngua angkoza namas:
ngua kebrah,
di ngua korsang di lalang,
nubu kung tona,
pra ngua mil dia nadi parah.