Pra skuleh palabra bong-bong, yo mistih drumih
bomong seguru. Yo mistih sabeh ki susegadu sa signifiku.
Yo mistih fikah impoku mas frimi
kung bos, kung tudu bolotu
sa sior-siora teng mang-mang suzu.
Bateh yo sa mang?
Nggeh, lah. Yo inda ta lambeh lalang:
pau-pau teru, ki yo ja buskah na yo sa jarding. Ja sunyah di yo sa familia sa prumirang.
Ja insinyah klai kumih kung yo, kora yo impoku mas krensa.
Kora yo ja tokah ingkontrah tudu korenta ladrang
na prumiru bes yo teng na stradu. Bringkah kung tudu jenti sa amiang-amiang?
Bos mutu prigasozu. Bai komprah bos onsong sa karta
pakau di tarot. Onsong sa siput. Onsong sa green parrot
pra dibinyah klai logu pasah.
Bos nenang ubih kung yo?
Yo inda ta santah naki, lambeh lalang
di kadangua omi kereh prendeh isti bista nubu di mundu seng kasang.
Kalsang mistih teng, ah? Isti linggu inda teng bos sa rostu;
isti kultura inda kereh tudu eli sa jenti malisozu
bai buskah onsong sa kura. Na sanggi, zeniyu kung osu.
Lambeh lalang ngsizu brasu di skulu;
justu nggua jarding teng tudu sorti di skudu
pra gadrah kontra tudu Maliduensa sa korpu
ja furtah di nus jenti sapiensu:
floris-floris ja spalah.
Suminti ja sunyah.
Peli-peli chuma armasang di koku.
Ngua jenti hierosa sa gabadisa, agora pra fing ja fikah
sonu.