Yo desah ngua jenti riku sa cheru;
ngua jenti ki sabeh klai olah yo sa olu
bong-bong. Klai mandah kung yo tres netang-netu
sabeh klai semulah yo sa korsang.
Yo ja ntarah mutu tantu rikeza, pra gadrah isti familia sa andasang.
Yo ja pedreh yo sa resipi-resipi. Ja sunyah kung onsong sa mang
na basu di Albi di Bida. Ta sperah
yo sa korsang. Kereh semulah
yo sa ladrang. Yo sa maridu ja prendeh
klai papiah Kristang nubu, maski isti linggu ja tokah fendeh
intresmiu speransa, kung matansa
di gobernu, na anu pasadu.
Yo sabeh tudu istoria-istoria
di Padri sa Chang.
Yo ja kuniseh kung tudu jenti
nenang ingkontrah kung yo sa Karimang
ja kriseh chuma ngua strela nubu, na yo sa seu skuru.
Yo kereh ngua floris birah di onti. Birah di ngua pasadu
undi yo ja abizah tudu bibeh kung yo pra sempri,
ngua jarding riku di tudu jenti sa cheru, tudu jenti sa korsang alegri—
yo kereh tudu yo sa fila-fila teng fortuna
bai rintah eternidadi
seng pekadu. Seng midu.
Seng kadangua angkoza tristi
inda ta kriseh na kada di yo sa lagri
ja skundidu. Na basu di floris-floris vanezmu, roisu, bedri—
yo inda logu abrih porta narenga,
dos-dos pra bida kung akeli otru
maneseh sa trindadi.