Ja chegah, sertu;
bai rintah kung tudu
bos sa amor, tudu bos sa korsang beneta.
Agora, yo ngka yo sa
aboh femi sa netu-netang-neta.
Justu
ngua tigri kereh buskah ngua sapatu
pra andah bai mundu
sa diskursu ta papiah di
amiang sa rikeza.
Beng nus bai.
Bistih bos sa chinela,
tirah tudu otru sa.
Isti andasang mistih andah bong-bong:
kauzu ngka andah kung peu seguru
yo sa gritah logu parseh chuma song-song
di tigri kung liang ja pedreh klai andah bomong
altu, bomong gabadu.
Yo ngka binturong
seng fortidang; yo gostah trapah,
subih, rudiah kaladu
ati bos birah di otru banda, bai falah kung yo:
mistih parah.
Magma kereh rabentah
di isti Vulkang,
ngua semprenza di vedra sa kontasang:
yo ja trapah
basu pa riba
na tras di bos sa ku,
tras di bos sa korsang.
Oh dekas; ki bos ja skundeh naki?
Bos ladrang
mbes, kilaya otru logu falah di isti
mansebu neches:
yo ja ingkontrah
ngua mang,
ngua kaminyu bai rintah
di bos sa kasang pichadu.
Asih, ja fazeh lesti?
Yo lo tirah kalsang.