Inundansa sa komesu,
agora nus sabeh keng sa falta: akeli bobu-bobu lepu,
ki lembrah atakah kung krengkrensa sa korsang limpu
logu judah kung olotu trukah. Fikah jenti chuma pesua.
Chuma olotu
pun kereh kumih di kadangua di semesta sa strela-strela.
Pustemadu! Bos falah, kung song altu. Bos nadi ingkontrah
jenti teng korsang mal chuma isti sorti di mufinu.
Bos njuadu olah
kung jenti kereh abrih tudu sorti di porta
pra sintih justu impoku afesang di alegria
di Deus. Di manusia
sa speransa. Nus
jenti difrenti. Klai bos
podih lembrah ki nus jenti igual,
yo impodih intindeh.
Yo, bos, nus, olotu—
tudu di nus bibeh
na isti chang seku, kereh lagri
di semesta pra kuzeh
ngua bida mas sertu.
Olotu sa afesang sertu mal mbes
mas korsang? Alma? Mulera? Korpu?
Yo inda konfiah na letra
di Jingkli Nona;
porta ja abrih
pun podih nubu fikah pichadu.
Bida mutu tantu pertu di morti, kung Maliduensa
inda podih buskah ngua otru kaminyu
ngka muladu
ngka seku.
Justu ngua mundu
pra tudu desah ngua kaza mas bunitu.