Aha! Ja chegah na riba;
asih, yo ja lembrah
bos impodih ki yo ja falah di subih montanya:
mistih fazeh restu. Mistih andah chuma lontra
ta nadah, kara ta mostrah tudu na seu;
Largah bos sa kansadu, bos sa pedra sa peu.
Kauzu isti korpu ngua mundu di repairu,
ngua lugah undi tudu podih achah abizu
santah bong-bong, santah seng fing;
Isti jenti Kristang agora sabeh eli sa odring
di kada kaminggeru nteh forsa pra sigih,
di kada kawahang ngka sabeh klai drumih
pra olah kara di onsong sa deus-deus, kung churah kung lagri
ki onsong desah, klanzang kung klaru kung sempri
ngua ardansa di tristeza, ki nadi podih
skiseh: isti roda mundansa sa dibeh.
Isti kowil, greza biara sa dizaboh antigu mbes:
ngua fuzimera ta drayah kung tudu kereh mazinyah di klai kereh
ngua kaza teng porta tudu ta bibeh.
Klai logu pasah? Bos ngka kuniseh?
Pra chegah na isti puntu, mistih prendeh sabeh:
Bida sa rikeza ngka presizu koreh.
Membes podih teng koitadu,
pra rintah mundu bos kereh kriseh.
No posts