Pra yo sa setyaboh machu Adriaan Koek, gobernu fing di Melaka Landes (1759-1825)
Krensa di istoria krensa;
krensa di ngua istoria nenang chegah.
Keng-keng falah tudu inchidu
keng-keng ngka sabeh kereh ta mintirah.
Kauzu sidadi-sidadi sa kurenti
nggeng podih dibinyah;
korti-korti sa mudansa
dretu sempri ta pasah prepresta.
Pra pichah oru,
mistih sabeh undi pegah:
anumbes na Upe,
na Yler,
na Bunga Raya pun?
Anumbes na futura sa fuzilada;
anumbes na granggrung.
Olotu ja dah rostu kung bos,
pra rezang bos memang impodih kuniseh;
yo pun, ati agora, sertu tudu inda ta prendeh
di klai bos ja judah nus sa surih-surih kriseh.
Sperah, kora akeli dia kontu nus ingkontrah ngua kung otru
nus dos-dos pun logu intindeh.
Otru jenti pun.
Tudu jenti di otru.
Kauzu pra pegah oru,
numistih fuzih, numistih kureh:
pra pegah tudu,
justu mistih santah bong-bong
kung ardansa champuradu sempri dah ngua grandi merseh.